Vardando un giardin, penso che se no ghe fussi le rose

ai ricordi ghe mancheria la beleza,

e se no esisteria el girasol, mancheria color ala memoria.

Vardando un giardin, digo grazie ala lavanda per el blu che la me ga regalà in estate,

e grazie ancora pel profumo che porto nel cuor.

Vardando un giardin, vedo che in primavera el mugheto gentil

fa a gara col semplice splendor del lilà,

e l'iris bela che ne parla de pase e concordia.

Vardando un giardin, scopro che la timida violeta xè fior de amor

e el tulipan cussì colorà, xè fior de alegria.

Vardando un giardin, noto l'ortensia nobile e solene che se rivela in penombra

e l'edera, che rampigandose per tuto elegante e curiosa,

la fa bei anca i muri veci e roti.

Vardando un giardin me vien de pensar:

chi xè più fortunà del giardinier, che co' le man sporche de tera e tanta fadiga,

pol piturar el mondo coi colori vivi del Creator,

per meter armonia e beleza nei oci e nei cuori de tuti?

di Paola Signorini